बड़ा दिनों का बाद आज एक पुराणु लम्पू मिलि जुकि सांदि पड़्यूं थौ - बेलीराम कंसवाल

22-09-2023 10:19 PM Editorial

बड़ा दिनों का बाद आज एक पुराणु लम्पू मिलि जुकि सांदि पड़्यूं थौ - बेलीराम कंसवाल

पैलि का जमाना जैकि

बड़ी डिमांड थै,

पुराणु लम्पू मिलि आज

सांदि पड़्यूं थै।

कखि बत्ती कखि अफू

खिखराण पड़ीं थै,

अर कै दिनौं का बाद

आज दुयूं कि भेंट ह्वै।

बचपनै कि याद तैन

सारी ताजा कै,

अर तै देखिक दै-दादा

जना सैनमुक्क ऐ।

पर मन मा भारी गुस्सा

तैका रोष चढ़्यूं थै,

निर्दयी हे मनखि तु मैं

किलै बिसरी गै।

बड़ू बणीगि आज भारी

निठुर ह्वै गै,

याद कौर बचपन मा

जब सिरड़ी गाडदू थै,

ग्वाया लगै लगै मेरी

धाधि औंदु थै,

अर मैं दगड़ि पड़ि पड़िक

हुंगारा लांदु थै।

सूणी सच्ची बात तैकि

आंसु छलकि गै,

पर बक्त कि या मार दिदा

मेरू दोष ना गणै।

छिलकौं का बाद तेरु

आगमन ह्वै,

अर बिजली का बाद तेरु

रिवाज बंद ह्वै।

पर सूण दिदा अपड़ा जमाना

तू भि कम नि थै,

रात भर राड़ू तेरु

त्वैन नाक काल़ा कै।

ओबरा बौंड जांदि बग्त

तेरा नखरा कम नि थै,

बिच सिढ़्यूं मा पट्ट बझिक

कख्यू नि रखदु थै।

पर बिसरि त्वै कतै नि सकदा

त्यरा उपकार इथगा रै,

त्यरै सारा चुछा हमुन

आखर भि बांच्या थै.........।।

रचना - बेलीराम कनस्वाल

Share: