मुबैल त्वैन ख्वैल्या मनखि : बेलीराम कंसवाल

मुबैल त्वैन ख्वैल्या मनखि : बेलीराम कंसवाल

टॉर्च गै रेड्यो गै,

घड़ी टैबरिकॉर्ड गै।

रीत गै रसाण गै,

पुराणि पौ पछाण गै।

मुबैल त्वैन ख्वैल्या मनखि।

बोल त्वैन इनु क्य कै।।

फेसबुक म मगन क्वीत,

वाटसप मा डुब्यां छन।

क्वी बणौंदा रील क्वीई 

सेल्फि लेण लग्यां छन।।

बाच सान बंद करीं,

मुबैलु मा धौण धरीं।

अफ्वीम छन हॅंसण लग्यां,

गाडैकि जनि छाया होईं।।

ओबरा क्वी त बौंड क्वी,

गैल मा मुबैल त्वी।

दग्ड़्या अब नि स्वांदा कै,

यखुलि रणौ  सौक ह्वै।।

बूबा की नि सुण्दु क्वी,

ब्वैक भी मुंडारु  कै।

फाइव जी की स्पीड मा,

डाटा की भि छाटि लै।

मुबैल त्वैन ख्वैल्या मनखि।

य मत्ति हरण किलै कै।।

चुडखि चुड़खि लांदा छुईं ,

खुली बात चीत गै।

अंगळू कु ह्वै काम जादा,

घीचक पर थैस ह्वै।।

हौड़ सुन्न पड्यां छीन,

लाटसाब बण्यां छीन।

फैशन का नौंकि दाड़ि।

रिक्क जना ह्वयां छीन। 

गात झड़्यां पात जना, 

हिटद सांस फुळ्दि छै।

ज्वानि मा लड्यूंत बूढ्या,

ब्वारि भि अब कैन दे।।

अजब छै यु यंत्र, 

तंत्र मंत्र इनु करीगे।

दूधि का भि बाळु तैं,

अपड़ि बौळ लगैगे।

ये बगैर नींद भूक,

हरचपंत करीं च।

जैम नीच तैक जनि,

भृगपंत होईं च।

कुल्लि गै दथड़ि गै,

हळुंगि, जाड़ि नसुड़ि गै।

सुप्पि सांदि व्वानि सांदि,

चौ-चलण ठप्प ह्वै।।

होक्का गै साज गै।

चिलम चग्ठि आग गै।

सयाणा जी कु चौक खालि,

तौंकि सय्णचार गै।।

कलम गै स्याहि गै।

आंखु की निगाहि गै।

ल्यखणकु सगोर अर,

रौ- रिश्त्यादारी गै  ।

चिट्ठी गै पत्रि गै,

सीडी अर टीवी गै।

फ्रेंडु का ट्रेंड मा,

पुराणि यारि दगड़ि गै।

मुबैल त्वैन ख्वैल्या मनखि ।।

सबुकि मत्ति हरण कै।।

रचना-

बेलीराम कनस्वाल

भेट्टी ग्यारह गांव, टिहरी गढ़वाल।