Holi in Uttarakhand: होलि मा ऐंसु इनु रंग लावा- बेलीराम कंसवाल

मित्रों होळि की असीम शुभकामनौं का साथ मा प्रस्तुत च बेली राम कंसवाल जी की एक रचना: 

शीर्षक-"होळि मा ऐंसु इनु रंग लावा"।

बसंत का रंगिला पर्व मा ऐंसु,

भैचारा कू रंग बरखावा,

जीवन भर जैकि की चमक बणीं रौ

होल़ि मा ऐंसु इनु रंग लावा।।

फागुण मा ऋतुराज भट्याणूं,

खुशहाली का द्वार उघाड़ा।

आंख्यूं मा रंगिला सुपिन्या सजैक,

फाग का मीठा गीत लगावा।।

मधुमास की मीठी रस सरिता मा,

जरा फूलौं की खुशबू चुरावा।

अर माया का पाणि मा, 

मनख्यात छोल़िक तैं,

प्रेम कू पक्कू रंग मिलावा।

जीवन भर जैकि चमक बणीं रौ,

होल़ि मा ऐंसु इनु रंग लावा।।

कांडा बूत्या ना फूल उगावा,

जीवन तैं रंगीन बणावा।

बुरा कर्म भला फल नी देंदा,

छैलु द्योजु इनि डाळि लगावा।।

खैरि का आंसू रंग मा भिजैक,

सुख की मथनी मा मथि द्यावा।

देवभूमि ईं धरति मा ऐंसु,

समृद्धि कू रंग चढ़ावा।।

जीवन भर जैकि चमक बणीं रौ,

होल़ि मा ऐंसु इनु रंग लावा।।

अबीर गुलाल सी चमकुन मुखड़ि,

कबळाट प्रेम बैख बाँदु कि जुकड़ि।

बासंती रुत आस लगीं रौ , 

मिलन की मीठी प्यास जगीं रौ।। 

नेकी का रंग लैन सदानि,

पढें खबर: Rishikesh: खदरी खड़क माफ में अज्ञात डंपर ने गिराया मलबा, दुर्गंध से लोग परेशान सड़क बंद, व्यापार प्रभावित

बेमानौं को बझ्यूं रौ पाणि।

दान धरम सत्कर्म दिखेंदू,

बाकी कुछ भी हाणि न गाणि।।

जीवन भर जैकी चमक बणीं रौ,

होळि मा ऐंसु इनु रंग लावा।।

फूलों सी हो चमक मुखों मा,

गोळ बटिन सब पौंछु टुखौं मा।

देवभूमि खुशहाल बणावा,

गरीब गुरुबू तैं उब्बू उठावा।।

दुख दर्द हर दूर कनक तैं,

समृद्धि घर द्वार भनक तैं,

नाथ द्वार इक अर्जि लगावा।

भक्ति म गैरा डुबिक तैं वै पर,

प्रभु को जा अनुमोदन ल्यावा।

जीवन भर जैकी चमक बणीं रौ,

होळि मा ऐंसु इनु रंग लावा।।

रंग बरखै द्या गात भिजै द्या, 

मैल का मैला दाग मिटै द्या।

लाल गुलाबी चटख रंगों न,

मन की हर कौझ्याळ मिटै द्या। 

 राग द्वेष सब दूर करिक तैं,

हे मनख्यों मनखि बणिं जावा।

जाति धर्म का भेद छोड़िक तैं 

देश प्रेम मा सबि रंगि जावा।।

जीवन भर जैकि चमक बणीं रौ,

होल़ि मा ऐंसु इनु रंग लावा।

होल़ि मा ऐंसु इनु रंग लावा।।

       रचना

बेली राम कंसवाल 

भेट्टी, ग्यारा गौं, बटिन।